MANILA, Philippines — Mayroong nakalaan na 20% pabuya para sa mga indibidwal na makapagbibigay ng tip sa mga smuggled na goods at items na matagumpay na masasabat ng Bureau of Customs (BOC).
Isiniwalat ito BOC Commissioner Bienvenido Rubio na ipinaliwanag na nakasaad ito sa umiiral na Customs Modernization and Tariff Act.
“If I’m not mistaken it’s about 20 percent of the value of the goods. Kapag iyong goods po na nakuha natin are goods of value na puwede nating i-auction then they are entitled,” saad ni Rubio.
Ngunit nilinaw niya na ang 20% pabuya ay kukunin sa aktuwal na benta ng nakumpiskang smuggled goods.
Hindi mabibigyan ng cash reward ang impormante kung idinonate ang mga smuggled goods, idineklarang ‘for official use’, muling na-export o kung winasak.
Kailangan din na hindi kabahagi sa ilegal na operasyon ng smuggling ang impormante at hindi nagsasagawa ng assessment o nasa enforcement sa pier kung saan prinoseso ang mga goods.