Kinidnap na Chinese, nasagip

MANILA, Philippines — Nasagip ng Philippine National Police -Anti Kidnapping Group (PNP-AKG) sa Batangas City ang isang babaeng Chinese na dinukot ng kanyang kababayan noong nakaraang buwan sa Angeles City.

Ayon kay PNP chief Gen. Rodolfo Azurin Jr., na-rescue ang biktima sa isang convenience store sa Barangay Alangilan, Batangas City kamakalawa.

Ikinulong ang biktima sa loob ng 20 araw sa cage sa loob ng kuwarto ng isang residential house sa Nueva Villa Subd., Brgy. Alangilan, Batangas City.

Nitong Huwebes ay nagawang makatakas ng biktima at na-rescue ng mga tauhan ng Alangilan Police Community Precinct ng Batangas-PNP.

Nabatid na nagpasaklolo sa PNP-AKG ang boyfriend ng biktima nang hindi na niya ito makontak.

Huling nakita ang biktima noong gabi ng Set­yembre 16 sa Hammer Disco Light Club in Barangay Balibago, Angeles City kasama ang isang kaibigan.

Setyembre 18 nang makatanggap ng tawag ang boyfriend ng biktima at humihingi ng US$2 milyon o P116 milyon.

Ipinadala rin ng suspek sa boyfriend ng biktima ang video clip na hinahataw ito ng baseball bat sa iba’t ibang bahagi ng katawan.

Wala namang naarestong suspect sa insidente.