Caloocan police chief sinibak: Dalaga sa tangkang kidnap, kinasuhan pa
MANILA, Philippines — Sibak ang hepe ng Caloocan City Police matapos na kasuhan ng libel ang isang dalaga na unang humingi ng tulong matapos na tangkang dukutin ng isang lalaki na nagpakilalang pulis kamakailan sa nasabing lungsod.
Ang sinibak ay si Col. Ferdinand Del Rosario na papalitan ni Col. Ruben Lacuesta bilang OIC ng Caloocan City Police.
Humingi naman ng paumanhin si Lt. General Jose Chiquito Malayo acting PNP chief sa biktimang si Samantha Pargad sa naging aksiyon ng Caloocan Police.
Batay sa record, unang humingi ng tulong si Pargad sa Caloocan Police matapos na sapilitang isakay ng isang lalaki na nagpakilalang pulis sa kanyang dalang motorsiklo.
Subalit sa ginawa umanong imbestigasyon ng Caloocan police ay magkakilala ang dalawa at imbes na tulungan si Pargad ay ito pa ang sinampahan ng kasong libel na nagdulot sa biktima ng demoralisasyon at takot.
Nangako naman si Malayo na aayusin ang imbestigasyon ng kaso ni Pargad.
- Latest