MANILA, Philippines — Umaabot sa 50 kabahayan ang naabo habang mahigit naman sa P1 milyon ang halaga ng napinsala sa naganap na sunog sa isang residential area sa Valenzuela City kamakalawa ng hapon.
Sa ulat ng Valenzuela City Bureau of Fire Protection (BFP), nagsimula ang sunog bandang alas-2 ng hapon sa kahabaan ng Tampoy 2 Street, Brgy. Marulas ng lungsod.
Mabilis na kumalat ang apoy sa mga kabahayan sa lugar kung saan idineklara ang 4th alarm bandang alas-3:10 ng hapon.
Dakong alas-4:50 ng hapon nang maapula ang apoy matapos na magresponde ang mga bumberto sa nasabing lugar.
Sa pahayag ni BFP Supt. Bernard Batnag, nasa 100 pamilya ang naapektuhan matapos na matupok ang nasa 50 kabahayan.
Kasalukuyan tumuloy sa Valenzuela National High School na ginawang pansamantalang evacuation center ang mga pamilyang nawalan ng tahanan .
Namahagi na ang pamahalaang lungsod ng Valenzuela ng relief goods sa mga pamilyang nawalan ng tahanan sa insidente. Patuloy namang inaalam ng mga awtoridad ang sanhi ng sunog..