Riot sa Quezon City Jail, pinabubusisi ni Mayor Joy
MANILA, Philippines — Ipinag-utos ni Quezon City Mayor Joy Belmonte na imbestigahan ang naganap na riot sa pagitan ng magkalabang gang sa Quezon City Jail Male Dormitory na nagresulta ng pagkamatay ng isang bilanggo doon.
Partikular na pinakilos ni Mayor Belmonte ang Quezon City Police District (QCPD) at Bureau of Jail Management and Penology (BJMP) para magsagawa ng malalimamg imbestigasyon sa insidente.
“Iniutos na natin ang malalimang imbestigasyon sa nangyaring riot sa Quezon City Jail para malaman ang puno’t dulo nito.Kailangang maparusahan ang mga nagpabaya sa kanilang tungkulin kung mayroon man, upang hindi na maulit pa ang ganitong klaseng insidente sa ating mga pasilidad,” paliwanag ni Mayor Belmonte.
Binigyang diin ni Belmonte ang kahalagahan na mapag- aralan ng BJMP ang kanilang security protocols upang maiwasan ang kahalintulad na insidente sa mga darating na panahon.
Sa ulat ng pulisya, nagkaroon ng riot sa pagitan ng mga miyembro ng ‘Batang City Jail’, ‘Commando’ at ‘Bahala na Gang’ ganap na alas- 3 ng hapon ng biyernes
May halos 10 preso ang nasugatan sa insidente ang dinala sa East Avenue Medical Center at isa dito ay namatay.
Patuloy na inaalam ng mga awtoridad ang ugat ng insidente.
- Latest
