MANILA, Philippines — Umarangkada na kahapon ang bakunahan sa Parañaque Integrated Terminal Exchange (PITX) sa ilalim ng “We Vax As One: Mobile Vaccination Drive” na nagsimula alas- 8:00 ng umaga hanggang alas-12:00 ng tanghali.
Ang programa ay mula sa Department of Transportation (DOTr) at Metropolitan Manila Development Authority (MMDA).
Kahapon nang simulan ang programa sa target na magbakuna ng hanggang 500 indibidwal. Tatagal ito hanggang sa Enero 28, 2022.
Sa mga nais magpabakuna, pwede nang dumiretso sa ikalawang palapag ng Gate 4 landport ng PITX building dahil pwede naman aniya, ang walk-in at hindi na kailangan ang pre-registration, kungdi dun na mismo magbibigay ng form para sa pagrerehistro.
Sa mga magtutungo para sa bakuna, kailangang dalhin ang vaccination card at valid ID.
AstraZeneca aniya, ang available para sa booster shots, o kahit sa first at second dose.
Matatandaang noong July 2021 ay nagsagawa rin ng kaparehong aktibidad ang DOTr sa naturang terminal.
Samantala, sinabi ni Jason Salvador, tagapagsalita ng PITX, na ipatutupad din ng PITX ang kautusan ni DOTr Secretary Art Tugade na “no vaccination, no ride/no entry” policy sa National Capital Region (NCR).
Samantala, plano ng Metropolitan Manila Development Authority (MMDA) na madagdagan pa ang vaccination sites sa ilang lugar at strategic locations gaya ng mga istasyon ng tren at paliparan, maging sa labas ng Metro Manila, upang mas palakasin ang pagsisikap ng gobyerno na makapagbakuna kabilang ang pagbibigay ng booster shots.