MANILA, Philippines — Dahil sa kahilingan ng karamihan para makapaghanda ang publiko sa pagkawala ng tubig sa ilang lugar sa Metro Manila mula Oktubre 25 hanggang 28, iniatras ng Maynilad ang simula ng water interruption na mag-uumpisa na sa Oktubre 29, Biyernes hanggang Nob. 1, Lunes.
Ang pagkawala ng tubig ay dulot ng gagawing pipe realignment sa kahabaan ng Sobriedad, Manila dulot ng flood control project ng DPWH.
Ang mga apektadong lugar ay makakaranas ng mula 25 hanggang 85 oras na walang tubig sa Las Piñas, Makati, Maynila, Parañaque, Pasay, Bacoor gayundin sa Cavite City, Imus, Kawit, Noveleta at Rosario sa lalawigan ng Cavite mula alas-11 ng umaga ng Oklt. 29 hanggang Nob.1 ng alas-11:59 ng gabi.
Ayon sa Maynilad na sa panahon na walang tubig sa mga apektadong lugar, maglalagay ang kompanya ng 14 na stationary water tank at 60 mobile tanker para may magamit ang mga apektadong residente.