MANILA, Philippines — Pinalawak pa sa 13 local government hospitals ang Phase 2 ng government pediatric vaccination sa Metro Manila kung saan nasa 144,000 kabataan inaasahang matuturukan sa pagpapatuloy ng pagbabakuna sa darating na Biyernes, ayon sa Department of Interior and Local Government (DILG).
Kabilang sa mga nadagdag na pagamutan ang pagdarausang ng pagbabakuna ay ang Caloocan Medical Center, Ospital ng Parañaque at Pasay General Hospital.
Nauna nang naisagawa ang pagbabakuna sa mga ospital sa Quezon City at sa Pasig City.
“Target nating mabakunahan ang nasa 144,131 kabataan mula 15 hanggang 17-anyos at ang prayoridad pa rin ay ang may comorbidities”, pahayag ni DILG spokesman Jonathan Malaya.
Muling nagpaalala si Malaya sa mga magulang na nagnanais na mapabakunahan ang kanilang menor-de- edad na mga anak na makipag-ugnayan sa kanilang local government .
Nagsimula ang pagbabakuna sa mga kabataan sa mga local government hospitals noong nakalipas na Biyernes, Okt. 15 at tatagal hanggang Okt. 31.
Mahigit na sa 90 milyon ang doses ng bakuna na natanggap ng bansa.
Ang pagbabakuna sa mga kabataan ay nakikitang isang component sa plano ng pamahalaan na face-to-face classes sa susunod na buwan.