MANILA, Philippines — Umabot na sa 901,839 doses ng bakuna ang naiturok sa mga taga-Quezon City sa pagpapatuloy ng Vaccination Program ng lokal na pamahalaan laban sa COVID-19.
Sa kabuuan, 663,828 o 39.05% ng 1.7 Million na target population ang nabakunahan na ng kanilang first dose habang 238,011 o 14% naman ang nakatanggap na ng kanilang second dose.
Pero sa ngayon, naubusan na ng suplay ng bakuna ang lungsod para sa mga nais tumanggap ng kanilang first dose.
Tanging ang mga nasa schedule ng kanilang second dose ang natitirang suplay ng bakuna.
Dahil dito, umaapela si Mayor Joy Belmonte sa Department of Health na bigyan na sila ng dagdag na suplay ng bakuna upang maipagpatuloy ang vaccination program ng pamahalaan.