Imbitasyon ng Liberal Party inisnab’ ni Yorme
MANILA, Philippines — Mistulang inisnab ni Manila City Mayor Isko Moreno ang imbitasyon ng Liberal Party nang sabihin nito na nakatutok pa rin siya sa paghahanda sa ‘bounce back’ ng siyudad sa oras na maabot na ang ‘herd immunity’ sa bansa.
Reaksyon ito ni Moreno sa imbitasyon ni Senador Kiko Pangilinan para makipag-alyansa sa Liberal Party para sa darating na 2022 National at Local Elections.
“Wala muna akong ine-entertain na mga political na bagay. All talks of coalition or any political talk is untimely and premature,” ayon kay Moreno.
Nakatutok umano siya sa pagpapabakuna sa 1.1 milyong Manilenyos sa kanilang 22 vaccination sites mula sa mga bakuna na sila mismo ang bumili at ang manggagaling sa nasyunal na pamahalaan.
“Looking forward hinahanda ko ang Manila para sa “Bounce Back” na inaasahan nating mangyayari ‘pag naka-herd immunity na tayo,” giit niya.
Samantala, sinabi naman ni Manila Chief of Staff Dr. Cezar Chavez na susunod ang pamahalaang lungsod ng Maynila sa utos ni Pangulong Rodrigo Duterte na gamitin pa rin ang face shield sa indoor at outdoors.
Matatandaan na si Moreno ang nanawagan kamakailan na huwag nang gamitin sa labas ang face shield at para na lamang sa mga pagamutan.
- Latest
