POGO worker 2 Chinese, 4 Pinoy arestado
MANILA, Philippines — Anim katao kabilang ang dalawang Chinese at apat na Pinoy ang nadakip ng mga tauhan ng Parañaque Police matapos na dukutin ang isa ring Chinese na POGO worker kamakalawa ng gabi sa nabanggit na lungsod.
Nasagip naman ang biktima na kinilalang si Li Le Le, 20, nakatalaga sa POGO Customer Service at residente ng Bayport West, Brgy. Tambo, Parañaque City.
Kinilala ni Parañaque Police chief, P/Colonel Maximo Sebastian, Jr. ang mga suspek na sina Chen Shiduan, 47; Chen Lianxing, 37; Joseph Cardona, 52; Benedicto Manicad, 48; Raphael Milang, 37, at Nida Bagtas, 49.
Sa ulat kay National Capital Region Police Office (NCRPO) Director P/Major General Vicente Danao Jr., nagpasaklolo ang ilang POGO workers sa Parañaque Sub-Station 3 hinggil sa kaibigan nila na ikinulong ng ilang indibiduwal sa 19th floor ng Washington Tower Marina Bay, sa Barangay Don Galo.
Agad nakipag-ugnayan sa mga opisyal ng barangay ang mga pulis at dakong alas-9:00 ng gabi nang salakayin ang lugar na nagresulta sa matagumpay na operasyon.May iba pang kasabwat na suspek ang patuloy na tinutugis.
“We thank the public for their increasing support and confidence given to our police. Through your cooperation and accurate reports, we get our work done efficiently and more suspects are arrested,” ani Danao.
- Latest
