Medical workers sa Quezon City, sinanay na sa pagbabakuna
MANILA, Philippines — Nagsagawa ng demonstration ang Quezon City Health Department sa tamang proseso ng pagbabakuna bilang paghahanda sakaling dumating na ang mga bakuna laban sa COVID-19.
Una sa limang hakbang ang registration kung saan maaaring iprisinta ang QCitizen ID, susundan ito ng counselling kung saan ipapaalam ng doktor ang mga maaaring side effects ng bakuna at mga karagdagang paalala.
Ikatlo ang screening, dito malalaman kung malusog ang pangangatawan at kung maaaring bakunahan ang tao, at pagkatapos ay isasalang na sa vaccination. Panghuli naman ay post-vaccination na dito ay oobserbahan ang nabakunahan ng 30 minuto hanggang isang oras kung magkakaroon ng reaksyon o side effects sa bakuna.
Una nang sinanay ng QCHD ang mga healthcare worker sa proseso ng tamang pagturok ng bakuna sa bawat indibiduwal.
Unang babakunahan sa QC ang mga frontliners at lahat ng health workers, mga elderly, mga may kapansanan at mga mahihirap na mamamayan sa lunsod.
- Latest
