2 ‘suspect’ sa Dacera case kakasuhan ng perjury — NCRPO
MANILA, Philippines — Posibleng madagdagan ang kasong kakaharapin ng dalawa sa 11 mga kaibigan ng flight attendant na si Christine Dacera makaraang ibulgar na pinilit at binugbog sila ng mga pulis para palutangin ang anggulo ng ilegal na droga.
Ayon kay National Capital Region Police (NCRPO) chief BGen. Vicente Danao, Jr. na walang pamimilit at pambubugbog na ginawa ang Makati police sa mga kaibigan ng flight attendant na si Christine Dacera na may illegal drugs na sangkot sa naganap na New Year’s Eve party sa isang hotel sa Makati.
Kasong perjury dahil sa pagsisinungaling ang ihaharap kina Jaypee dela Serna at Rommel Galido.
Ayon kay Danao, nakakapagtaka na nagsalita ang mga kaibigan ni Dacera na sila ay binugbog at napressure kaya napilitan silang sabihin na may ginamit na illegal drugs.
Aniya panay ang pain-terview ng mga ito sa iba’t ibang social media platforms at iisa ang kanilang sinasabi.
“Bakit ngayon lang? Hindi natin alam, as far as the Makati City police station is concerned, per information coming from the chief of police himself, there is no such thing as bugbugan (mau-ling), coercion, or anything about drugs where they were coerced into making statements,” ani Danao
Sinabi nila Dela Serna at Galido noong Miyerkules na nagsinungaling sila nang banggitin ang Mark Anthony Rosales na may dalang illegal drugs noong party.
Binawi ni Dela Serna ang una niyang pahayag hinggil dito gayundin si Galido sa pagsasabing hindi totoo na nagsalita sa kanya si Dacera na may inilagay sa iniinom nito.
Nakatakda ang preliminary investigation sa Enero 27 habang hinihintay pa ng mga imbestigador ang resulta ng forensics tests kabilang na ang DNA analysis, toxicology/chemical analysis, histopathology examination, at laboratory results mula sa Makati Medical Center.
- Latest