MANILA, Philippines — Tuluyan nang tinanggal kahapon ni Quezon City Mayor Joy Belmonte ang Special Concern Lockdown (SCL) sa mga lugar na dati’y maraming kaso ng naturang COVID-19.
Sa anunsyo kahapon ni Mayor Belmonte na ang huling nasa ilalim ng SCL sa Alleys 1 at 2 sa Block 17, Brgy. Bungad ay inalis na dahil wala nang kaso dito ng COVID-19.
Una nang natanggal ang pagpapatupad ng lockdown sa ilang bahagi ng Iba Street sa Brgy. Paang Bundok at tatlong street sa Zytec Riosa Compound sa Brgy. Pasong Tamo dahil wala na ring naitalang kaso ng COVID dito.
“This is another positive development in our fight against the virus. This is another indication that we’re headed in the right direction, in addition to the drop in number of our active cases”, pahayag ni Belmonte.
Gayunman, nanawagan si Belmonte sa mga taga-QC na patuloy pa ring mag-ingat at huwag magpapabaya at laging sundin ang ipinatutupad na health protocol gaya ng pagsusuot ng face mask, face shield, paghugas ng kamay, at social distancing upang makaiwas sa muling pagsulpot ng virus sa kanilang lugar.
“Wala na tayong nakikitang posibleng local o community transmission sa mga lugar na ating binabantayan kaya hindi na kailangan ang SCL sa ngayon,” pahayag naman ni City Epidemiology and Disease Surveillance Unit (CESU) head Dr. Rolly Cruz.
Mula noong buwan ng Mayo ngayong taon, 68 lugar na may halos 11,134 pamilya ang naisailalim sa SCL.
Sa kasalukuyan, umabot na sa 94% ang recovery cases sa QC mula noong magkaroon ng community transmission ng COVID-19.