MANILA, Philippines — Inihanda na ng Metro Manila Development Authority (MMDA) ang 64 pumping stations sa National Capital Region (NCR) bago pa man ang pagtama ng bagyong Rolly.
Babantayan din ng MMDA ang mga lugar o bahagi ng Metro Manila na madalas bahain.
Tiniyak ng MMDA na mamomonitor ang sitwasyon ng mga naka-duty na 24/7 flood control unit employees.
Bukod sa pumping stations, kinalas na rin ang mga billboards na maaring magdulot ng aksidente sa oras na manalasa ang malakas na hangin at ulan na dala ni Rolly.
Ang Manila Disaster Risk Reduction and Management Office (MDRRMO) ay naghanda na rin ng rescue boats sakaling lumaki ang baha.
Itinaas na rin nitong Biyernes (Okt. 30) ang heightened alert sa Maynila para sa pagresponde sa posibleng mga pagbaha, magbabagsakang istruktura at iba pang sitwasyon tulad ng sakunang maaring idulot ng bagyo
Sa Pasay City, sinabi ni DRRMO Chief Dr. Boyet Maranan na handa na rin sila sa pagtama ng bagyo.
Kabilang sa critical areas ng Pasay ang Maricaban, Malibay, Pildera, Kalaayan at Villamor na may sari-sarili nang mini-evacuation center sakaling may dapat ilikas at may nakahanda ring relief goods.
Inatasan din ni Pasay Mayor Emi Rubiano-Calixto ang City Health Office na magbukas ng health center bilang paghahanda rin sa bagyo.