MANILA, Philippines — Naglunsad ng ‘ rolling meals on wheels ‘ ang National Capital Region Police Office (NCRPO) para sa supplemental feeding program sa mga estudyanteng undernourished .
Isa pa ito sa programang inisyatibo ni P/Major General Debold Sinas na tinawag niyang “Kalusugan Mo, Pangangalagaan Ko”.
Layunin ni Sinas na makatugon sa pagsusumikap ng gobyerno na makatulong sa mga mamamayang mahihirap na apektado ang kabuhayan dahil sa pandemya COVID-19.
Ang feeding program ay upang mapunan ang malnutrisyon ng mga kabataan sa pamamagitan ng vitamins and iron fortified rich foods.
Sinimulan ang proyekto sa Barangay 1 ng Caloocan City at Barangay Bagong Ilog, sa Pasig City noong Oktubre 16, 2020 sa pamimigay ng hot meals sa bahay-bahay.
Nitong Linggo, ang Manila Police District Crime Laboratory personnel at iba pang presinto ay nagdaos din ng feeding program na “NCRPO’s Nutritious Meals on Wheels” sa ilalim ng “Kalusugan Mo Pangangalagaan Ko”.
Kabilang sa ipinamahagi ang vitamins at mga gamot habang isinisilbi naman ang masustansiyang lugaw , nutri-pasta, nutri-oats chocolate, brown rice nutty fruity bar at freshly-prepared chocolate milk drink.