QUEZON CITY, Philippines — Matapos ang pitong buwan na pagsasara sa Ninoy Aquino Parks and Wildlife Center sa Quezon City dahil sa banta ng COVID-19, pinayagan na ngayon ng Department of Environment and Natural Resources (DENR) na buksang muli ang parke sa publiko pero may limitasyon.
Sa ipinalabas na media advisory ng Wildlife Center and Management ng DENR, sa ngayon ang maaari pa lamang papasukin sa naturang parke ay ang mga gagawa ng private at commercial videos at photo shoot pero susundin ang itinakdang health protocols.
Kabilang sa mga nakalinya na magsagawa ng video at photo shoot sa naturang parke ay ang aktibidad ng Super Model Philippines na gaganapin sa October 31.
Hindi pa naman maaaring pumasok sa Wildlife Center ang mga walk-in visitors .
Ayon sa DENR , ang mga magsasagawa ng videos at photo shoot sa Wildlife Center ay kailangang kumuha ng schedule online o kaya ay maaring tumawag sa kanilang hotline sa 8924-6031 o mag-email sa NAWPC@BMB.GOV.PH.
Ang Ninoy Aquino parks and Wildlife Center na malapit sa QC Memorial Circle at Lung Center of the Philippines ay may lawak na 23 ektaryang lupain na kakikitaan ng 3,000 ibat -ibang uri ng puno at mahigit 30 uri ng wildlife animals.