MANILA, Philippines — Higit sa 400 mga patalim at iba pang armas ang nadiskubre ng mga tauhan ng New Bilibid Prisons (NBP) sa ginawang ‘Oplan Galugad’ sa dalawang gusali sa ‘maximum security compound’ ng mga sangkot sa riot nitong Oktubre 9.
Sinuyod ng mga tauhan ng Bureau of Corrections (BuCor) ang Building 5 at 8 nitong Lunes ng hapon na inookupa ng ‘Sputnik at Commando ‘ gangs.
Dito nadiskubre ang sari-saring mga armas tulad ng lagari, martilyo, crowbars at mga kahoy na pamukpok. Nakatago ito sa mga selda, mga pansamantalang tirahan habang ang ilan ay ibinaon pa sa lupa.
Isinagawa ang paggalugad makaraang makatanggap ng ‘intelligence report’ ang BuCor na patuloy na may mga maiinit na miyembro ng dalawang gang at nagpaplano muli ng karahasan.
Ito ay sa kabila ng pakikipagdayalogo ni BuCor Director General Gerald Bantag sa mga lider ng dalawang gang na nangako na ititigil na ang kanilang iringan.
Matatandaan na isang riot sa pagitan ng dalawang gang ang naganap nitong Biyernes kung saan siyam na bilanggo ang nasawi habang pito pa ang sugatan.
Nag-umpisa nang magsagawa ng sariling imbestigasyon ang National Bureau of Investigation (NBI) sa insidente makaraang hindi makuntento si Department of Justice Secretary Menardo Guevarra sa inisyal na ulat na isinumite ng BuCor sa kaniya.