Sa pagpunta sa mga sementeryo
MANILA, Philippines — Inihahanda na ng Metro Manila Mayors ang mga ipapatupad na guidelines hinggil sa pagdagsa ng mga dalaw sa mga sementeryo bago ang itinakdang pagsasara ng mga ito sa panahon ng Undas mula Ocktubre 29 hanggang Nobyembre 4.
Ayon kay Parañaque City Mayor Edwin Olivarez, Chairman ng Metro Manila Council , maglalagay ng security personnel at marshals sa mga sementeryo upang tulungan ang mga pulis na maipatupad ang health protocols.
Ang mga bisita sa mga sementeryo ay inaabisuhan na ipatupad ang 30-percent capacity na itinakda ng pamahalaan.
“Magkakaroon tayo ng marshal kasama ang ating PNP para ipatutupad ang physical distancing at hindi po magkaroon ng gatherings,” pahayag ni Olivarez.
Una nang inanunsyo ng Malakanyang na sarado sa publiko ang lahat ng sementeryo at columbariums sa buong bansa sa panahon ng Undas.
Dahil sa patuloy na pagtaas ng kaso ng COVID-19 sa bansa, hinikayat ng pamahalaan ang publiko na magtungo sa sementeryo bago sumapit ang October 29 o pagkatapos ng Nobyembre 4.
Pinangangambahan na dadagsa ang mga tao sa mga sementeryo at columbaries kung papayagang buksan ito sa panahon ng Undas at posibleng maging ugat ito sa pagtaas pa ng kaso ng COVID- 19.