MANILA, Philippines — Binago ng pamunuan ng Metro Rail Transit Line 3 (MRT-3) ang schedule nang ipinatutupad nilang weekend suspension sa kanilang mga tren.
Ayon sa MRT-3, base na rin ito sa rekomendasyon ng kanilang maintenance provider na Sumitomo-MHI-TESP.
Sa advisory na ipinalabas MRT-3, sinabi nito na mula sa dating Agosto 8-9, Agosto 21-23, at Setyembre 12-13, ay gagawin nang Oktubre 10-11, Oktubre 31, Nobyembre 1-2 at Nobyembre 14-15 ang kanilang weekend suspensions.
“Upon recommendation of maintenance provider Sumitomo-MHI-TESP, the MRT-3 will reschedule its weekend suspension of operations for rail replacement works from August to September to October to November 2020. According to Sumitomo-MHI-TESP, this is due to travel restrictions being imposed by countries to prevent the spread of COVID-19,” bahagi ng advisory ng MRT-3.
Tiniyak naman anila ng Sumitomo-MHI-TESP na ang naturang re-scheduling ay hindi makakaapekto sa target completion nila ng rail replacement sa katapusan ng Setyembre 2020, gayundin sa planong pagdadagdag ng train speed nila na 40kph sa Oktubre, 50kph sa Nobyembre at 60kph sa Disyembre 2020.
Nabatid na kabilang sa rail replacement works na gagawin sa naturang weekend suspension ay turnout works para sa southbound at northbound tracks sa North Avenue at Taft Avenue stations.