Pribado man o public transportation
MANILA, Philippines — Pansamantalang sinuspinde ng Department of Transportation (DOTr) ang pag-aangkas sa motorsiklo pribado man o public transportation kaugnay na rin sa pagsisikap ng pamahalaan na mapigilan ang tuluyang pagkalat ng coronavirus disease 2019 (COVID-19) sa bansa.
Ayon kay DOTr Undersecretary Artemio Tuazon, ang pagba-ban ay bahagi ng kanilang guidelines para sa social distancing.
“Hindi puwede ‘yung may backride sa motorsiklo. Isang tao lang po ang puwedeng sumakay sa motorsiklo”, pahayag pa nito.
Paliwanag ni Tuazon, hindi muna pinapayagan ang pag-aangkas sa mga motorsiklo dahil madidikit ang angkas sa rider nito at magiging madali ang paglipat ng virus.
Nitong Sabado, una na rin namang naglabas ng magkahiwalay na pahayag ang motorcycle-hailing firms na Angkas at JoyRide, na nag-aanunsiyo ng suspensiyon ng kanilang passenger services sa Metro Manila simula nitong Linggo, Marso 15, kasabay ng pag-iral ng community quarantine.
Sa sandali naman umanong matiyak na ligtas na ang Metro Manila mula sa virus ay ipagpapatuloy na rin nilang muli ang kanilang passenger services.
Una nang nilimitahan ng DOTr ang bilang ng mga pasaherong maaaring sumakay sa taxi hanggang sa tatlo lamang, habang ang mga UV Express vans at public jeepneys ay inatasan na kalahati lamang ng kanilang mga pasahero ang isakay.
Ang mga bagon naman ng tren ay dapat na magsakay lamang ng 25% ng kanilang passenger capacity. Dapat din umanong nakaupo ang lahat ng pasahero nito.