PCSO, lilikha ng bagong laro
MANILA, Philippines — Inihayag kahapon ng pamunuan ng Philippine Charity Sweepstakes Office (PCSO) na lilikha sila ng mga bagong laro upang malaki ang kitain at mas maraming mamamayan na nangangailangan ang kanilang matulungan.
Sa isang press conference, sinabi ni PCSO Assistant General Manager for Gaming Arnel Casas na marami silang bagong laro na ikinakasa sa ngayon upang makahikayat pa ng mga mamamayan na makiisa at sumali sa “game of charity”.
Bukod dito, plano rin aniya nilang i-repackage ang iba pa nilang mga games na hindi masyadong tinangkilik ng publiko upang makabawi ang mga ito mula sa mababang kita.
Ayon naman kay PCSO General Manager Royina Marzan-Garma, na kumita ang PCSO ng mahigit P44 bilyon noong nakaraang taon.
Mas mababa umano ito ng 31 porsiyento kumpara noong nakaraang 2018, na nakapagtala ng P63.5 bilyong kita.
Ipinaliwanag ni Garma na ang pagbaba ng kita ay epekto sa kanila ng Train Law.
Bumaba rin umano ang kita sa lotto mula sa dating P31 bilyon noong 2018 ay naging P21 bilyon na lamang ito.
Nagsimula ang pagbaba ng profit sa lotto matapos na mapanalunan ang P1.18 bilyon na jackpot prize noong 2018.
Bukod sa pagbuo ng mga bagong palaro, plano rin nilang palitan ang pangalan ng ilang PCSO games, babaan ang halaga ng taya sa Keno games mula sa dating P12 ay gawing P10 at ipatupad ang balik taya para sa Lotto at Keno games.
Tiniyak din ni Garma na hindi sila titigil sa pagkakaloob ng tulong sa mga taong nangangailangan ng financial support para sa kanilang gamot, gayundin sa mga biktima ng kalamidad.
Sa kasalukuyan, kabilang sa mga PCSO games ay lotto, Keno, Small Town Lottery (STL), Peryahan, Instant Sweepstakes, at iba pa.
- Latest