Trader, timbog sa pagbebenta ng nakaw na laptop
MANILA, Philippines — Timbog ang isang negosyante sa isinagawang entrapment operation ng mga awtoridad dahil sa pagbebenta ng nakaw na laptop sa isang mall sa Mandaluyong City, kamakalawa ng gabi.
Ang suspek ay kinilalang si Moamar Moctar, 36, may asawa, at residente sa naturang lungsod.
Ang suspek ay inaresto dakong alas-7:45 ng gabi sa loob ng isang kilalang mall sa Brgy. Wack-Wack, Mandaluyong City.
Ayon sa reklamo sa pulisya ni Mark John Salazar, 32, binata, nakita niya sa online market ang nawawala niyang laptop kaya nakipag-ugnayan siya sa suspek na bibilhin ang nasabing laptop at nagkasundong magkikita sa mall para sa bayaran.
Nakipag-ugnayan naman sa pulisya ang biktima kaya isinagawa ang entrapment operation.
Aktong inaabot ng biktima ang perang 57,000 sa suspek nang siya ay arestuin ng mga awtoridad
Kuwento pa ng biktima na kamakailan lang ay nabiktima siya ng Basag Kotse Gang sa Makati City at tinangay ang kanyang laptop at iba pang gamit.
- Latest
