Dahil sa pinupuslit na mga kontrabando
MANILA,Philippines — Ni-recall ng National Capital Region Police Office (NCRPO) ang nasa 200 pulis na nakatalaga sa New Bilibid Prison sa Muntin-lupa City matapos akusahan ang 16 sa kanila na nagpupuslit ng kontrabando sa loob ng piitan.
Ayon kay NCRPO Director Brig. Gen. Debold Sinas, ibabalik sa kanilang headquarters ang mga ni-recall na pulis.
Samantala, isinailalim naman sa floating status habang nahaharap sa administrative investigation ang 16 na pulis na umano’y nagpasok ng sigarilyo, alak at cellphones sa loob ng NBP.
Sinabi ni Sinas na pinag-aaralan din kung sasampahan ang mga sangkot na pulis ng kasong kriminal.
Binebenta umano ng 16 na pulis ang alak sa mga bilanggo sa ha-lagang P10,000 hanggang P20,000 kada litro.
Sa kabila nito, bukas pa rin ang NCRPO sa pagpapahiram ng mga tauhan sa NBP kung nanaisin pa rin nila. Maaari umanong gawin ito na pinakamahaba na ang 30 araw na deployment bago sila palitan para maiiwas sa tukso ng korapsyon.
Una nang inihayag ng NCRPO na humi-ling si Bureau of Corrections Director General Gerald Bantag ng police reinforcements sa Bilibid habang ang mga jailguards ay sumasailalim sa training at evaluation, dahil sa isyu ng korapsyon.