Sunog sa Maynila, 100 bahay tupok
MANILA,Philippines — Umaabot sa 100 kabahayan ang tinupok ng apoy na sumiklab sa isang residential area sa Quiricada St., Sta.Cruz, Maynila.
Sa report ng Bureau of Fire Protection, alas-11:50 ng tanghali nagsimula ang sunog sa ikatlong palapag ng bahay sa Quiricada St., na pag-aari ng Jennifer Garcia na mabilis na kumalat sa mga katabing bahay.
Mahigit 264 na pamilya ang naapektuhan sa sunog matapos matupok ang kanilang mga bahay na gawa sa light materials dahilan din kaya mabilis na kumalat ang apoy.
Nabatid kay Manila Disaster Risk Reduction Management Office chief Arnel Angeles ang nasunog na residential area ay likuran lamang ng Manila Central Fire Station at harap ng San Lazaro Hospital, ligtas naman sa insidente ang kalapit na Health Center.
Ayon kay Fire Sr/Supt Rodolfo Denaga, sugatan sa insidente ang fire volunteer na si John Rodrigo Tapa, 23, na nagtamo ng sugat sa kanang kamay at nalunasan na rin ng Phil Red Cross
Nahirapan aniya ang mga bumbero na pasukin ang lugar kung saan nasa looban ang bahay na pinagmulan ng sunog dahil sa masikip na eskinita.
Dakong ala- 1:37 ng tanghali nang ideklarang fire under control ang sunog na umabot sa Task Force Bravo ang alarma na puminsala sa tinatayang P800,000 na halaga ng mga ari-arian.
- Latest
