Dami ng pasahero ng MRT-3, target madoble
MANILA, Philippines – Inihayag ng pamunuan ng Metro Rail Transit Line 3 na target nilang madoble ang mga pasaherong sumasakay sa MRT-3.
Sinabi ni MRT-3 Director for Operations, Engineer Michael Capati, mula sa kasalukuyang 300,000, ay nais nilang gawing 600,000 ang kanilang passenger capacity araw-araw.
Kumpiyansa na si Capati na maaabot nila ang naturang target, sa pamamagitan nang pag-rehabilitate sa kanilang mga riles, pag-upgrade ng kanilang signalling system, at pagdaragdag ng bilang ng mga operational nilang mga tren.
Aniya, dadagdagan nila ang kasalukuyang 15 running trains ng hanggang mahigit 20.
Inaasahan din aniyang mababawasan ang passengers’ travel time dahil plano nilang dagdagan ang kanilang train speed, at gawin itong 60 kilometers per hour (kph) mula 30 kph lamang.
Sa sandali aniyang maisagawa ang mga naturang pagbabago, ang headway o waiting time ng mga pasahero sa platform ay magiging 3.5 minuto na lamang, mula sa dating 7.5 minuto.
Ibinida rin ni Capati na naging maganda ang initial test run ng Dalian train, na sinimulan nilang ibiyahe nitong Martes ng gabi, sa riles ng MRT-3.
Ipinaliwanag ni Capati na bagama’t tatlong set na ng Dalian tren ang nakakumpleto ng commissioning at validation tests, ay gagawin lamang nilang gradual o unti-unti ang deployment ng mga ito.
- Latest