MANILA, Philippines — Patay ang isang mister matapos na tambangan at pagbabarilin ng riding-in tandem sa Quezon City, kahapon ng umaga.
Ang biktima ay nakilalang si Joffrey Pastolero, 51, mekaniko, na nakatira sa Brgy. Quirino, Quezon City.
Sa imbestigasyon ng pulisya, nabatid na ang krimen ay naganap dakong alas-10:55 ng umaga sa panulukan ng Nangka St., corner Pajo St., sa lungsod.
Ayon sa report, sakay ang biktima ng kanyang kulay green na kotse nang abangan at lapitan ng dalawang suspek at walang sabi-sabing pagbabarilin sa iba’t ibang bahagi ng katawan.
Tiniyak ng mga suspek na patay na ang biktima bago nila ito iniwan at tumakas sakay ng isang motorsiklo.
Sinabi ng mga testigo, kapwa nakasuot ng itim na jacket at helmet ang dalawang suspek kaya hindi nila mailarawan ang kanilang mga mukha.
Sa ngayon ay nagsasagawa pa masusing im-bestigasyon ang mga awtoridad para matukoy ang mga salarin, mabatid ang motibo ng krimen at madakip ang mga ito.