MANILA, Philippines — Sa kulungan ang bagsak ng dalawang sinasabing bigtime ‘tulak’ ng droga matapos masakote sa isinagawang drug-bust operation ng mga tauhan ng Philippine Drug Enforcement Agency (PDEA) sa Brgy. Pinagbuhatan Pasig, kamakalawa ng hapon.
Kinilala ni Director III Joel Plaza, Regional Director ng PDEA, ang nadakip na sina Ryan Chui Caiton, at Julius Paya Villanueva, pawang 29-anyos at residente ng naturang lugar.
Ayon kay Leveret Lopez, District Officer ng Eastern District ng PDEA, dakong alas-5:30 ng hapon nang nakipagtransaksyon si Caiton sa isa nilang tauhan na tumayong buyer ng shabu sa gasolinahan sa Urbano Ave., sa nasabing barangay.
Habang nagkakaabutan ng shabu at pera ang magkabilang panig ay agad na nagsilabasan ang mga nakakubling PDEA agent at dinakma ang mga nabanggit na suspek.
Nakumpiska sa mga suspek ang 25 gramo ng hinihinalang shabu na nagkakahalaga ng P170,000, drug paraphernalia, isang cellular phone, isang pulang Mitsubishi Galant (UBZ 69), isang weighing scale, isang black pouch, isang asul na Chituma motorcycle, at boodle money.
Nabatid na dati nang nakulong si Caiton matapos masangkot sa droga pero nakalaya sa pamamagitan ng ‘plea bargaining agreement.’
Itinanggi naman ng mga suspek na sa kanila ang nakuhang droga at sasakyan.