MANILA, Philippines — Tiniyak kahapon ni National Capital Regional Police Office (NCRPO) Director PMaj/Gen Guillermo Eleazar na handa silang protektahan si Pangulong Rodrigo Duterte sakaling magdesisyon itong lumabas sa Batasan Complex at harapin ang mga demonstrador sa kalsada ngayong araw ng State of the Nation Address.
Sinabi ni Eleazar na may nakahanda silang “contigency plan” sa oras na gawin ito ng Pangulo tulad ng ginawa niya sa nakaraang SONA.
Tinatayang 14,000 pulis bukod pa sa mga tauhan ng Armed Forces of the Philippines at mga force multipliers ang ikakalat sa mga kalsada at iba pang istratehikong lugar ngayong araw ng SONA.
Pinakamalaking puwersa ang itatalaga sa mga lugar na pagdarausan ng rally ng mga pro at anti-Duterte groups partikular sa Commonwealth Avenue at IBP Road malapit sa Batasang Pambansa Complex sa Quezon City.
Ngayong taon, papayagan ng pulisya na makalapit ng hanggang 50 metro ang mga demonstrador sa Batasang Pambansa Complex south gate. Tinatayang dadagsain ng nasa 15,000 raliyista ang SONA.