Babae kinatay ng binasted na manliligaw
Bangkay isinilid sa sako
MANILA, Philippines — Karumal-dumal na kamatayan ang sinapit ng isang 22-anyos na babaeng supervisor sa isang supermarket matapos katayin na parang hayop at isinilid ang bangkay nito sa isang sako ng manliligaw na pinaniniwalaang kanyang binasted naganap sa Muntinlupa City, nitong Sabado ng umaga.
May malalim na sugat sa ulo, wakwak ang tiyan, laslas ang kamay at halos matanggal na ang daliri ng biktimang si Sheva Adare Mae Prementil, 22-anyos, at tubong Bukidnon nang matagpuan sa storage room ng Buko Island sa may No. 059-H Nofuente Compound, Purok 2, Brgy. Cupang, ng naturang lungsod.
Ikinasa naman agad ng Muntinlupa City Police ang manhunt operation sa suspek na si Alexander Morpuz, 23-anyos, nakatira sa bodega kung saan natagpuan ang bangkay ng biktima.
Sa ulat, alas-11:00 ng umaga nang matagpuan ang bangkay ni Prementil na nakasilid sa isang sako ng kanyang tiyuhin at ama ni Morpuz sa bodega matapos mapansin ng housemate ng biktima na duguan ang kanyang kama.
Nang panoorin ang kuha ng closed circuit television (CCTV) camera, nakita si Morpuz na naghahatak ng isang sako mula sa bahay na tinutuluyan ng biktima dakong alas-3:00 ng madaling araw.
Nabatid sa imbestigasyon na dating nililigawan ni Morpuz ang biktima ngunit binasted umano ito.
Nabatid din na anim na buwan pa lang na nakatira sa lugar ang suspek habang isang taon nang nangungupahan ang biktima sa bahay na katabi ng bodega.
- Latest