MANILA, Philippines — Swak sa selda ang tatlong sinasabing ‘iskorer’ ng shabu matapos arestuhin ng mga pulis makaraang madaanan at sitahin sa isinagawang anti-crime operations, sa magkahiwalay na lugar sa Sampaloc, Maynila, kamakalawa ng gabi.
Sa ulat ng pulisya, unang naaresto ng Gulod Police Community Precinct (PCP) ang massage therapist na si Edmeralyn Duco, alyas “Arlene”, 38-anyos, residente ng Mindoro St., at Mary Ann Mariano, 41, ng Gerardo St.; pawang sa Sampaloc, Maynila
Dakong alas-10:00 kamakalawa ng gabi nang mamataan ang dalawa ng mga pulis sa panulukan ng Mindoro at Mindanao Avenue.
Nang sitahin ay hindi umano mapakali ang dalawa kaya tinanong kung ano ang hawak sa kamay hanggang sa napilitang ipakita sa mga pulis ang hawak nilang maliliit na sachet ng shabu kaya agad na binitbit sa presinto.
Bandang alas-11:30 ng gabi naman nang maaresto ang tricycle driver na si Arturo Santos, 44, residente ng San Antonio St., Sampaloc, Maynila.
Namukhaan umano ang nasabing suspek dahil nakalinya ang mukha nito sa drug watchlist ng presinto.
Hinarang at kinapkapan si Santos kung saan nakumpiska ang isang sachet ng shabu na nagkakahalaga ng P200.
Naniniwala ang mga operatiba na kaiiskor o kabibili pa lamang ng mga suspek ng nasabing iligal na droga na pinaniniwalaang gagamitin nila subalit naudlot nang masabat.