MANILA, Philippines — Jailmates na ngayon ang isang mag-live-in partner nang masakote ang isang babae sa ipupuslit sanang sachet ng shabu na nagkakahalaga ng P.1-milyon na itinago sa secret pocket ng kanyang bag nang dumalaw sa kanyang nakapiit na partner sa Navotas City jail, nitong Biyernes.
Himas-rehas na rin ngayon ang suspek na si Avegail Umali, nasa hustong gulang, matapos mabigong maipuslit ang droga na para sa nakakulong na si Reginal Jacobe.
Ayon sa ulat, hindi umano mapakali ang suspek nang dumaan sa pag-iinspeksyon ng mga otoridad kung saan mahigpit nitong hawak ang kanyang bag.
Nang suriing mabuti ang nilalaman ng bag ay dito na nakita ng mga otoridad ang nakatagong shabu sa loob ng isang secret pocket.
Nahaharap na ngayon sa kasong paglabag sa Republic Act (RA) 9165 o Comprehensive Dangerous Drugs Act of 2002 ang suspek.