Gusali ng EAC na ‘humilig’ dahil sa lindol hindi na ipagagamit-DPWH

Doris Franche(Pilipino Star Ngayon)

April 24, 2019 - 12:00am

Ininspeksyon ni Manila Mayor Joseph Estrada ang gusali ng Emilio Aguinaldo College (EAC) sa San Marcelino St., Manila na bahagyang pumaling sa katabing condominium, nabitak at naglaglagan ang bahagi ng semento bunsod ng 6.1 magnitude earthquake. Inatasan ni Mayor Estrada ang Manila City Engineers office na magsagawa ng ocular inspections sa lahat ng government buildings upang matiyak ang kaligtasan ng publiko.

MANILA, Philippines — Inirekomenda na ng Department of Public Works and Highways (DPWH) sa pamunuan ng Emilio Aguinaldo College (EAC) na huwag nang gamitin ang kanilang gusali na naapektuhan ng lindol noong Lunes ng hapon.

Ipinabatid ito ni DPWH Secretary Mark Villar na nagsabi ring pinalilikas na nila ang mga occupant sa nasabing pasilidad.

Bumagsak ang malaking bitak ng semento mula sa gusali ng EAC matapos ang magnitude 6.1 na lindol noong Lunes.

Kinordon na rin ng DPWH ang lugar para maiwasan ang dagdag pang pinsala sakaling may bumagsak na debris mula sa gusali.

Ayon kay Villar, mas kailangan na unahin ang kaligtasan ng publiko kaysa sa istruktura ng gusali.

Dapat na paghandaan ang posibleng muling pagyanig kung saan maaaring maapektuhan na ang mga lumang gusali.

Umapela din si Villar sa publiko na agad na ipagbigay alam sa kanila kung may mga istruktura o kalsada na nagkaroon ng bitak dahil sa lindol.

SPONSORED ARTICLES