MANILA, Philippines — Todas ang isang 23-anyos na welder matapos pagsasaksakin ng kanyang kapwa welder habang nagtatalo kahapon ng madaling araw sa Caloocan City.
Nakilala ang nasawi na si Ronel Languita, residente ng No. 123 West Ave., Brgy. Bungad, Quezon City.
Nadakip naman ang suspek na si Joshua Flores, 21, residente naman ng Tondo, Maynila.
Sa ulat ng Caloocan City Police, naganap ang insidente dakong alas-3:15 ng madaling araw sa kahabaan ng J. Teodoro St., sa Brgy. 48 Gracepark, ng naturang lungsod.
Ayon sa saksing si Rogie Zabala, nakita niyang nagtatalo sa gilid ng kalsada ang dalawa hanggang sa bumunot ng patalim ang suspek at sunud-sunod na undayan ng saksak ang biktima.
Agad na tumakbo palayo ang suspek dala ang patalim na ginamit sa krimen.
Huli na nang makaresponde ang mga pulis nang maiulat sa Police Community Precinct 2 ang insidente dakong alas-4:00 na ng madaling araw.