MANILA, Philippines – Patay ang isang 23 -anyos na dalaga makaraang maubusan ng dugo matapos na magpa-abort sa isang maliit na hotel sa Sta. Cruz, Maynila, kahapon ng madaling araw.
Ala-1:55 ng madaling araw kahapon nang ideklarang patay sa Jose Reyes Memorial Medical Center (JRMMC) ang biktimang si Tiffany Mae Del Rosario, ng Sta.Cruz, Maynila.
Ayon sa ulat, mag-isang nag-check-in sa isang maliit na hotel sa Rizal Avenue, Sta. Cruz, Maynila ang biktima alas -3:15 ng hapon at dakong alas- 9:15 ng gabi nang tumawag ng saklolo sa front desk.
Nang respondehan ng room boy ay nakitang wala na itong malay. Nakakalat ang maraming dugo sa silid ng biktima hanggang sa comfort room kaya isinugod sa nasabing pagamutan.
Sa CR ay nakuha ang lumulutang na fetus na tinatayang nasa 6 na buwan habang sa silid na inokupa ay nakita naman ang nasa 21 tableta ng Methylergometrine, 2 Cytotec tablet, 6 na Amoxicillin capsule at 6 na paracetamol tablet.