MANILA, Philippines — Patay ang isang kasero nang saksakin sa dibdib ng tenant nito na siningil niya sa upa, kamakalawa ng gabi sa Caloocan City.
Isinugod sa Manila Central University Hospital ngunit hindi na rin umabot ng buhay ang 25-anyos na si John Axle Guireba ng Brgy. 155 Bagong Barrio, ng naturang lungsod.
Nadakip naman ang suspek na nakilalang si Christi Modesto, 46, may-asawa at nakatira sa Lirio Street, ng naturang barangay.
Sa ulat ng pulisya, alas-11:15 ng gabi nang maganap ang insidente sa harap ng paupahang bahay na nirerentahan ng suspek. Nabatid na nagtungo sa apartment na inookupa ni Modesto sa naturang dis-oras ng gabi at ura-uradang siningil ang suspek ng kanyang buwanang renta.
Dito nagkaroon ng pagtatalo sa pagitan ng dala-wa hanggang sa kumuha ng patalim sa loob ang suspek at pagsasaksakin sa dibdib ang biktima.