MANILA, Philippines — Agad na nasawi makaraang mabagok ang ulo ng isang lalaki nang masagi siya ng isang rumaragasang trak sa gilid ng C3 Road sa Navotas City, kamakalawa ng gabi.
Nakilala ang biktima na si Rodolfo Puzon, 59 ng Bldg. 30, Unit 514, Paradise High, Balut, Tondo, Maynila. Nadakip naman ng mga awtoridad ang driver ng trak na si Gilbert Largo, 44, nakatira sa Bocaue, Bulacan.
Sa ulat ng Navotas City Police, naganap ang insidente dakong alas-11:40 ng gabi sa C3 Road sa may Brgy. North Bay Boulevard South (NBBS) sa naturang lungsod. Naglalakad sa gilid ng kalsada ang biktima nang bigla siyang masagi ng isang Isuzu truck (RFY-387) na minamaneho ni Largo.
Dito bumagsak sa kalsada ang biktima at nabagok ang ulo na nagresulta sa kanyang agarang pagkasawi. Nahabol naman ng mga awtoridad ang trak at nadakip nina traffic enforcer Ricardo Ramos at Marlon Sulit ang tsuper na si Largo.
Isinugod naman sa Tondo Medical Center ang biktima ngunit idineklara siyang wala nang buhay. Nahaharap naman ngayon sa kasong Reckless Imprudence Resulting in Homicide ang suspek na si Lagro.