MANILA, Philippines — Nagdulot ng matinding trapik sa mga motorista ang karambola ng apat na sasakyan kahapon ng hapon sa Makati hanggang Quezon City.
Ayon sa twitter ng Metropolitan Manila Development Authority (MMDA), naganap ang insidente alas-2:39 ng hapon sa Southbound lane ng EDSA-Buendia ng naturang lungsod.
Naaksidente ang apat na sasakyan na kinabibilangan ng isang P2P bus, isang van at dalawang SUV, na nauwi sa karambola ng mga ito.
Halos sinakop ng mga ito ang tatlong lanes, na nagdulot ng mabigat na daloy ng trapiko sa mga motoristang bumabagtas sa Southbound lane ng EDSA kung saan umabot hanggang Timog sa Quezon City ang masikip na trapik na naging kalbaryo ng maraming motorista at commuters.
Sa ngayon ay iniimbestigahan pa ng mga awtoridad ang pangyayari.