MANILA, Philippines — Nalasog ang isang 5-anyos na batang babae makaraang mabundol at magulungan pa ang ulo ng isang van, kamakalawa ng gabi sa Caloocan City.
Isinugod sa Caloocan City Medical Center ngunit hindi na umabot ng buhay ang biktimang si Athea Joy Saniel, ng Block 4 Lot 13 Ta-nigue Street, Samatad Compound, ng naturang lungsod.
Hawak naman ngayon ng pulisya ang suspek na si Cesar Garana, 58, at nakatira rin sa naturang lugar.
Sa ulat ng Caloocan City Police, naganap ang insidente dakong alas-8 ng gabi sa may Tanigue St. sa Samatad Compound. Minamaneho ni Garana ang isang Isuzu aluminum van na pag-aari ng kanyang pinapasukang kompanya at ipaparada na ito nang maganap ang aksidente.
Ikinatwiran ni Garana na hindi niya napansin ang paslit na naglalaro sa kalsada kahit gabi na nang mabundol ng kanyang behikulo. Nagpatuloy sa pag-andar ang van hanggang sa tuluyang magulugan ang ulo ng bata.