Precinct commander sa Navotas, 2 tauhan sinibak
Hindi masawata ang pagdami ng mga batang ginawang courier ng sindikato ng droga
MANILA, Philippines — Dahil sa pagkabigo na matunugan at masawata ang paggamit ng mga sindikato ng ilegal na droga sa mga bata, sinibak sa kanilang puwesto ang hepe ng Navotas Police Community Precinct na nakakasakop sa Navotas Fish Port at dalawa pang tauhan.
Kinumpirma ni Navotas City Police chief, Sr. Supt. Ramchrisen Haveria, Jr., ang pagkakatanggal sa puwesto nina PCP 3 commander Police Insp. Resty Descalzo, at mga tauhan na sina PO3 Randy Belly at PO1 Jejomar Padasas.
Ang kanilang istasyon ang nakakasakop sa Market 2 sa Navotas Fishport na sinalakay kamakailan ng mga tauhan ng Philippine Drug Enforcement Agency (PDEA) kung saan na-rescue ang 12 kabataan na may edad apat hanggang 15-anyos na ginagamit ng sindikato ng droga na tagabantay sa drug den at nakikipagtransaksyon din sa mga dumadayong drug users.
Nabatid na sinibak ang mga pulis makaraang mabigo na matunugan ang paggamit ng sindikato sa mga bata lalo na ang mapigilan ito.
Ang Market 3 rin ay kilalang kuta ng mga drug suspek na paulit-ulit na sinasalakay ngunit hindi nagagawang masawata ang mga sindikatong nag-ooperate rito.
- Latest
