Mataas na multa sa illegal parking simula na sa Enero 7
MANILA, Philippines — Simula sa Enero 7 ng susunod na taon ay tataas na mula sa P1,000 hanggang P2,000. ang multa sa mga motoristang lalabag sa mga batas trapiko tulad ng illegal parking.
Ayon kay MMDA spokesperson Celine Pialago, magiging P1,000 na ang multa sa violator na motorista para sa attended illegal parking, na sa kasalukuyan ang multa ay nasa P200, samantalang sa unattended illegal parking ay magiging P2,000, na ang multa na sa ngayon ay P500.
Para naman sa mga lalabag sa traffic obstruction at ignoring traffic signs, P1,000 na rin ang multa dito na sa kasalukuyang nasa P150.000 lamang.
Ang lalabag sa yellow lane sa EDSA, ay magiging P1,000 na rin ang multa, na ang kasalukuyang multa ay P500 para sa pribadong behikulo at P300 para naman sa pampublikong behikulo.
Sabi ni MMDA General Manager Jojo Garcia, ang pagtataas ng multa sa bawat traffic violation ay bunsod ng resolution na inaprubahan ng Metro Manila Council (MMC) noong Disyembre 7 at nai-published noong Disyembre 12 ng taong kasalukuyan.
Naniniwala ang MMDA, na sa pamamagitan aniya ng bagong patakaran ay luluwag na mula sa masikip na daloy ng trapiko ang Metro Manila lalo na ang EDSA.
“Maganda ito kasi nga makakadaan na ang mga sasakyan at luluwag ang kalsada lalo na sa mga alternate routes natin going outside EDSA,” ani Garcia.
Ngunit nilinaw nito, na ang mga siyudad na may existing traffic city ordinances lalo na sa pagpaparada ay hindi aniya sakop ng bagong patakaran.
- Latest
