MANILA, Philippines — Isa ang patay, habang apat ang sugatan kabilang ang dalawang menor de edad nang tumbukin ng humaharurot na kotse ang likurang bahagi ng tricycle na nagsisilbing delivery vehicle ng yelo, sa Tondo, Maynila, kahapon ng madaling araw.
Kinilala ang nasawi na si Felix Patilagan, ng Agora Navotas City, driver ng tricycle, habang ginagamot pa sa Tondo Medical Center ang mga sugatang sina Rafael Santos, 32; Sherwin Caguco, 16; Simplicio Elcalma, 14, at Norberto Trogon.
Nakapiit naman ang driver ng Toyota Vios na si Michael Russel Lopez, 25, ng Balut Tondo na sinasabing nakainom at mabilis ang pagpapatakbo.
Sa ulat mula kay Senior Insp. Jaime Gonzales ,deputy chief ng Vehicle Traffic Investigation Section ng Manila District Traffic Enforcement Unit, dakong alas -5:30 ng madaling araw kahapon nang maganap ang insidente sa panulukan ng H. Lopez Blvd. at San Raphael St. sa Tondo.
Mabilis umano ang takbo ng kotse kung saan nabundol nito ang hulihang bahagi ng tricycle hanggang sa madamay pa ang nakaparadang Honda Click at iba pang tricycle maging ang nakatayo lamang na si Santos.