MANILA, Philippines — Pinaalalahanan ng pamunuan ng Manila International Airport Authority (MIAA) ang mga pasahero na inaasahang dadagsa sa mga paliparan bago sumapit ang Undas na mahigpit na pinaiiral ang inspeksyon sa sapatos.
Inihayag ito ni MIAA general manager Ed Monreal upang hindi magaya kay ACTS-OFW Partylist Rep. John Bertiz na nalagay sa kontrobersya makaraang tumanggi na tanggalin ang kanyang sapatos.
Sinabi ni Monreal na dapat sumunod ang mga pasahero na mainspeksyon ang kanilang mga sapatos at ipakita ang kanilang mga bulsa sa final security check sa mga paliparan. Ipinaliwanag niya na ang pagsasagawa nito ay para na rin sa kaligtasan ng lahat.
Ipinaalala rin ng opisyal na dapat i-monitor ng mga pasahero ang lagay ng panahon at posibleng kanselasyon ng mga biyahe ng eroplano dahil sa inaasahang pagdating sa bansa ng bagyong Rosita.
Inaasahang lalapag sa bansa ang bagyo sa Cagayan-Isabela sa darating na Martes at magdudulot ng pag-ulan sa malaking parte ng bansa.