74 nasampolan sa basura sa Maynila
MANILA, Philippines — Bilang bahagi ng programa sa basura, 74 katao ang dinakip ng Manila Police District matapos na maaktuhang nagtatapon ng basura kung saan-saang lugar sa lungsod.
Ayon kay Manila Mayor Joseph ‘Erap’ Estrada, mahigpit na ipinagbabawal ang basta pagtatapon ng basura gayundin ang paglalabas ng basura nang hindi pa dadaan ang truck na kokolekta nito.
Kinasuhan ng paglabag sa City Ordinance 1158 o Illegal Disposal of Garbage ang mga dinakip matapos magsagawa ng operasyon sa Road 10 corner Pacheco St, Tondo; Oroquieta, Blumentritt, Sta Cruz.
Nabatid na agad na pinag-utos ni MPD Director Rolando Anduyan ang pagdispatch ng mga pulis para sa anti-illegal garbage disposal bunsod na rin ng walang habas na pagtatapon ng basura sa mga kalsada.
Lumilitaw na naglabas ng kautusan si Estrada sa MPD na magsagawa ng gabi-gabing operasyon laban sa mga illegal na nagtatapon ng basura upang mapanagot sa batas ang mga ito.
“Huwag naman silang magtapon ng basura kung saan-saan lang, hintayin nila ang garbage truck dahil inaayos nating mabuti ang sistema ng koleksiyon ng basura,” ani Estrada.
Hinikayat din ni Estrada ang mga mamamayan ng Maynila na tumulong sa kanyang kampanyang malinis ang lungsod. Aniya, dapat na maging responsable ang bawat residente at Manilenyo sa pagtatapon ng basura dahil ito ang isa sa mga dahilan ng pagbabaha.
- Latest