MANILA, Philippines — Maagang tumirik ang biyahe ng Metro Rail Transit Line 3 (MRT-3) kung saan pinababa ang may 850 pasahero dahil sa pagkakaroon ng electrical failure sa bahagi ng Makati City, kahapon umaga.
Batay sa abiso ng Department of Transportation (DOTr), dakong alas-6:23 ng umaga nang magkaroon ng problema sa daloy ng kuryente sa isang tren sa southbound ng Guadalupe station.
Dahil dito, pinababa ang mga pasahero upang mahila ang train sa kanilang depot at makumpuni.
Kaagad din namang naisakay sa kasunod na tren ang mga pinababang pasahero, matapos ang may 9-minuto.
Humingi agad ng paumanhin ang pamunuan ng DOTr-MRT-3 sa mga pasaherong naapektuhan ng aberya.
Paliwanag nila, dumanas ng electrical failure ang tren dahil sa mga luma at palyadong sub-components nito.