P5.4-M shabu mula Africa nasabat sa NAIA
Magdyowa swak sa selda
MANILA, Philippines — Tumataginting na P5.4-milyong halaga ng shabu na idineklarang isang ‘art table’ package na mula pa sa bansang Congo sa Africa ang nasabat ng mga otoridad sa Ninoy Aquino International Airport (NAIA) habang arestado ang suspek na mag-live-in partner na umano’y recipient ng nasabing package nitong Sabado ng hapon.
Nakilala ang mga nadakip na sina Julie Ann Lozada at live-in partner niya na si Cyril Garcia Cabigan, pawang mga residente ng Dasmariñas, Cavite.
Nabatid na unang nasabat ng mga tauhan ng Bureau of Customs ang iligal na droga nitong Setyembre 21 makaraang makakuha ng datos buhat sa impormasyon na ibinigay ng United States Bureau of Food and Drugs.
Nadiskubre ang iligal na droga sa bodega ng isang courier company na unang idineklarang isang “art table” ngunit may laman na iligal na droga na tumitimbang ng 800 gramo.
Ayon kay NAIA district collector Mimel Talusan, kinilala niya ang consignee na isang Joy Bido Mariel na kinalaunan ay natukoy na si Lozada habang ang sender ay isang Asumani Lofeta.
Nagsagawa ang NAIA-Inter Agency Drug Interdiction Task Group ng ‘‘controlled delivery’’ sa address sa Dasma-riñas, Cavite na dapat padadalhan ng package na nagresulta sa pagkakadakip sa dalawang suspek.
Itinanggi naman ng dalawang suspek na alam nila na iligal na droga ang laman ng package na ipinadala sa kanila.
- Latest