Estrella-Pantaleon bridge, isinara na
MANILA, Philippines — Sarado na sa mga motorista simula ngayong araw na ito ng alas-8:00 ng umaga (Linggo) ang Estrella-Pantaleon Bridge na nag-uugnay sa Makati at Mandaluyong City na sasailalim sa rehabilitasyon sa loob ng 30 buwan.
Ayon kay Metropolitan Manila Development Authority (MMDA) General Manager Jojo Garcia, ang pagkukumpuni ng naturang tulay ay isasagawa ng Department of Public Works and Highways (DPWH) bilang bahagi ng multi bilyong piso na ayuda ng gobyerno ng China.
Sabi ni Garcia, na hindi pa nila malalaman ang negatibong resulta nito, subalit nasa 100,000 motorista ang magiging maapektuhan sa isinarang tulay.
“Wala tayong magagawa, we need to close this to rehabilitate and replace with the new ones. On Monday, I don’t know what will happen,” ani Garcia.
Dahil aminado ang MMDA, na itinuturing na hopeless case ang matinding trapik, payo ni Garcia sa mga motorista na pairalin ang sariling disiplina at ang “bigayan system” para aniya ma-minimize ang masamang epekto nito.
Muling umapila si Garcia sa mga motorista na magsagawa ng carpooling para mabawasan aniya ang mga behikulong bumabagtas sa mga lansangan lalo na sa EDSA.
- Latest