Ilang kalye sa Maynila, isasara
MANILA, Philippines — Pinaalalahanan kahapon ng Metropolitan Manila Development Authority (MMDA) ang mga motorista na magtutungo sa area ng Maynila dahil ngayong araw ng Biyernes (Setyembre 21) at Linggo (Setyembre 23) na isasara ang ilang kalye dito bunsod nang paggunita sa deklarasyon ng Batas Militar kung saan kabi-kabila ang isasagawang rali ng iba’t ibang grupo.
Magkatuwang ang MMDA at Manila District Traffic Enforcement Unit (MDTEU) sa pagmementina sa daloy ng trapik na nagsabing, simula ngayong alas-6:00 ng umaga (Biyernes), isasara sa mga motorista ang north at southbound lane ng Roxas Boulevard mula Katigbak hanggang Pres. Quirino Avenue.
Ang eastbound lane ng T.M Kalaw mula Ma. Orosa hanggang Taft Avenue, east at westbound lane ng TM Kalaw mula M.H Del Pilar hanggang Roxas Boulevard.
Ito ay bunsod nang gagawing “Talakayan sa Mapayapang Paggunita ng Martial Law”.
Kung kaya’t pinayuhan ang mga motorista na iwasan ang naturang mga lugar at dumaan na lamang sa mga itinalagang alternatibong ruta para hindi maabala sa trapik.
Sa mga cargo truck na dadaan sa Osmeña Highway, kumanan sa Pres. Quirino Avenue diretso sa Nagtahan, A.H Lacson, Yuseco St. tawid ng Jose Abad Santos at dumiretso sa Raxabago, Capulong at sa destinasyon.
Sa mga dadaan naman ng southbound mula sa Pier area ay dumaan na lamang sa R-10, kanan sa Capulong at diretso sa Yuseco st patungo sa A.H Lacson patungo sa destinasyon. (Ludy Bermudo)
- Latest