MANILA, Philippines — Pisak ang isang misis habang sugatan ang dalawa nitong kasama matapos sumemplang ang sinasakyan nilang motorsiklo at minalas na mahagip ng kasunod na dump truck sa Brgy. Concepcion Uno, Marikina City kamakalawa ng gabi.
Nakilala ang nasawi na si Mernalyn Aquino, 30, habang ang mga nasugatan naman sina Benedict Chavez, 20, waiter at Aurelia Santos, 18, estudyante.
Kusang loob naman sumuko sa mga awtoridad ang driver ng truck na si Larry Santiago, 42.
Sa imbestigasyon ng Marikina City Police, nabatid na dakong alas-9:15 ng gabi nang maganap ang aksidente sa JP Rizal kanto ng Libis Street, sa Brgy. Concepcion Uno.
Sinasabing magkakaangkas ang tatlong biktima sa isang motorsiklo at bumibiyahe sa southbound lane ng JP Rizal, nang pagsapit sa kanto ng Libis Street, ay bigla na lang sumemplang dahil sa madulas na kalsada.
Hindi naman kaagad na nakapag-preno ang kasunod nilang dump truck, na minamaneho ni Santiago, kaya’t minalas na mahagip sila nito.
Napuruhan si Aquino ng gulong ng truck habang tumalsik at nasugatan naman sina Chavez at Santos, na ngayon ay ginagamot pa sa hospital.