Sinalpok ng motorsiklo: Ginang patay, anak sugatan
MANILA, Philippines — Isang 48-anyos na ginang ang nasawi habang sugatan naman ang anak niyang grade 2 pupil matapos silang salpukin ng isang humaharurot na motorsiklo habang tumatawid, kamakalawa ng gabi sa Navotas City.
Namatay habang ginagamot sa Tondo Medical Center ang ginang na si Alma Davidon, 48,ng Abraham St., Sitio Santo Niño, Brgy. North Bay Boulevard South (NBBS) ng naturang siyudad.
Ginagamot naman sa Jose Reyes Memorial and Medical Center ang anak nitong si Oliver Davidon, 7-anyos, grade 2 pupil matapos magtamo ng mga sugat sa katawan.
Samantala, ang driver ng motorsiklo na si Anthony Untalan Jr., 19, estudyante, ng Bougainvillea St., Happy Land, Brgy. 105, Tondo, Manila ay inilipat sa detention cell ng Navotas City Police matapos itong lapatan ng lunas sa Tondo Medical Center sanhi ng mga tinamong minor injuries.
Ayon sa imbestigasyon ng Navotas City Traffic Bureau, naganap ang insidente alas-6:00 kamakalawa ng gabi sa kahabaan ng Road 10, Sitio Santo Niño, Brgy. NBBS ng naturang siyudad habang papatawid ang mag-ina at siya namang paparating ang humaharurot na Honda motorcycle (NE-90120) na minamaneho ni Untalan.
Dahil sa mabilis ang pagpapatakbo, huli na bago nito nakontrol ang preno ng motorsiklo at nasalpok na nito ang mga biktima hanggang sa tumilapon ang mga ito.
Sa lakas nang pagkakabangga ay tumilapon din ang rider mula sa kanyang motorsiklo at bahagyang nasugatan.
Nahaharap sa kasong Reckless Imprudence Resul-ting to Homicide at Serious Physical Injury si Untalan.
- Latest